護眼小知識

眼鏡如果污漕左，好多人都會隨手用件衫或者紙巾抹乾淨，其實咁樣係好容易刮花鏡片嘅鍍膜架！ 如果鏡片上有污漬或面油，可用少少稀釋左嘅洗手液，搽喺鏡片上面打圈咁捽走污漬，用清水冲乾淨，再用眼鏡布抹乾。但如果要抹走灰塵，就要避免喺鏡片中間打圈抹，應該要由左至右向外抹，防止鏡片容易刮花。另外，記得唔好用熱水或酒精度高嘅消毒濕紙巾嚟清潔眼鏡，否則會令鍍膜受損，無得修補架喇～ 🎨 IG @notabearrr

其實眼睛同身體嘅其他器官一樣，都係需要透過均衡飲食嚟補充營養，先可以達到護眼效果。多啲食深綠色蔬菜、新鮮嘅魚類，適當地補充莓果同埋堅果，以少油、少鹽嘅清淡方式烹調，不但只有利健康，仲有助遠離眼睛病變。 另外，隨著年紀增長，身體對抗自由基嘅能力會逐漸減弱，水晶體都會因為氧化而變得混濁，要對抗體內堆積嘅活性氧，就要增強身體嘅抗氧化能力，多補充以下幾種營養素，就可以有效咁達到抗氧化功效！ * 維他命 A* β-胡蘿蔔素* 鋅* 維他命 C* 維他命 E* 奧米加-3* 葉黃素* 玉米黃素 🎨 IG@notabearrr

眼睛淚水分泌會隨住年齡增加而減少，過去乾眼症患者多數係高齡族群。但而家呢個年代乾眼症已經漸漸年輕化，因為大部分人工作時需要長時間望住電腦、智能電話，或者係長期配戴隱形眼鏡，導致眼表面嘅淚液量減少誘發乾眼症。 如果覺得自己有輕微眼乾，眼科醫生建議試試以下方法：1/ 每工作六十分鐘遙望遠景約六分鐘，望綠色物件最為理想。2/ 咪埋眼，再上下左右咁轉動眼球。3/ 天氣乾燥時，可以利用發熱包或熱敷眼罩敷眼，促進眼淚分泌。4/ 利用放濕機提升室內濕度，減少淚水揮發。淚水有保護角膜嘅作用，如果失去淚水保護，角膜有機會受細菌感染而受損、結疤，最終令視力下降，造成不可逆轉嘅傷害，所以係唔能夠忽視架（尤其長時間戴隱形眼鏡嘅客人）！ 🎨 IG @notabearrr

眼睛痕嘅時候，你會下意識捽一捽眼以為無傷大雅，但有眼科醫生指出，原來過度捽眼會令角膜變形，形成「錐形角膜」（即係眼角膜好似檸檬咁凸出）可引致近視、散光，甚至致盲，10至40歲更屬於高危一族。過敏係眼睛痕癢嘅常見元兇，平日多加留意避開致敏原，以減少捽眼機會。 大部分人偶爾捽一次眼，即使有小傷口都可以喺幾個鐘內癒合（當然最好就唔好捽眼啦！）但係若然傷口太大、太深又或者一直重覆受傷，而上皮層趕唔切癒合，就有可能成為細菌或微生物嘅溫床，增加細菌感染嘅風險。萬一形成疤痕，可能會令視力受損。 另外，大部分有捽眼習慣嘅患者同時會有眼睛痕癢、紅腫、分泌過多（流眼水/ 多眼膠）或乾澀刺痛嘅徵狀。所以！如果想保持眼睛健康，就要記得勤洗手，同埋戒左捽眼嘅壞習慣喇！ 🎨 IG @notabearrr

夏天嘅陽光越嚟越強烈，除左要幫皮膚防曬外，其實眼睛都需要防曬架！喺日常嘅可見光之中，包括左高能量嘅紫外線，而紫外線又分為唔同嘅波長：從長到短可分為UVA、UVB、UVC。由於UVA波長較長，穿透力相對較強，連臭氧層都隔絕唔到。所以喺我哋嘅日常生活中仍然接觸得到UVA，無論天睛或天陰佢都無處不在。UVA可引發眼瞼惡性腫瘤、光性角膜炎等病變。長時間累積下，亦可能造成黃斑病變。 如果唔需要長期喺戶外活動嘅人士，我哋建議可以放副太陽眼鏡喺袋，隨時拎出嚟使用。但當然購買時要睇清楚太陽鏡片係防UV400先好買呀（好多人唔知：如果有懷疑可以叫店員用機Check比你睇架！）有近視嘅話，可以配有度數嘅太陽鏡片或者Clip-On太陽夾片，咁就方便好多喇。如果係有需要長期喺戶外活動嘅人士，就最好配一對變色太陽鏡片，咁就唔怕成日唔記得帶太陽眼鏡啦！ 🎨 IG @notabearrr

網上曾經流傳夜晚熄燈後摸黑玩手提電話，會導致視網膜黃斑病變，但有眼科醫生指出，畢竟智能電話係近十年先興起，現時未有足夠嘅數據顯示使用電子發光屏幕會直接引致黃斑病變，但智能電話發出嘅高能量可見光（High Energy Visible Lights，俗稱藍光）仍然會對黃斑區有害。因為喺黑暗嘅環境中，瞳孔會放大，眼睛就有機會吸收更多高能量可見光。有醫學研究已顯示，動物長時間吸收更多高能量可見光，會對黃斑構成傷害，情況類似黃斑病變。 其實要都市人完全唔用智能電話係無可能嘅，所以眼科醫生就建議大家一係將電話屏幕嘅字體放大，一係就較低屏幕嘅光暗度，減低眼睛喺閱讀屏幕時嘅不適感。又或者每20分鐘放一放低部電話20秒，令眼睛得到充份休息。所以大家記得要喺光線充足嘅環境下使用電子產品，最好就配一副備有防藍光功能嘅眼鏡加強保護啦！ 🎨 IG @notabearrr